منوعات

زغووووووطه … هئ

بقلم الاعلاميه رنا مصطفى


حله البرستو
( عارفين حله البرستو ؟؟) الحله دي كان لينا الفخر إننا كنّا أول من استخدمها ، كنت صغيره جدا وقتها .. وكنت مستغربه ياتري ايه اللي مختلف في الحله دي عن الحلل العاديه … كنت أقف أتفرج عليها لما البخار يطلع من الغطا وتبتدي تصفر واضحك … ( الحقوا الحله بتبصبص للبراد اللي في مطبخ الجيران ) .
لما كبرت شويه عرفت ان الحله دي بالضغط وعلشان قانون الفيزياء بيقول ان الضغط يولد الانفجار … كان لازم يبقي في منفذ لهذا الضغط قبل مرحله الانفجار ..
هو ده اللي بيحصل لنا بالظبط لما الضغط العصبي ( stress ) يتحكم في حياتنا ..
من اشهر برامج التوك شو في امريكا برنامج Dr Phil وهو معالج نفسي سابق ،من أشهر مقدمي البرامج ، حاصل علي دكتوراه في الصحه النفسيه
ونشر العديد من المؤلفات حققت اعلي نسبه مبيعات في نيويورك ، منهم كتاب عجبني جدا اسمه (Real Life ) او ( الحياه علي ارض الواقع ) .. بيحكي فيه ان إحنابنتعرض علي مدار حياتنا ل ٧ أزمات تصنف من اصعب ايام حياتنا .. ازاي بنتقبلها ، نحلها ، نتجاوزها ونخرج منها بأقل الخسائر النفسيه والعصبيه .
سردها كالتالي :-
الأزمه الأولي – هي ان قلبك يتكسر سواء بفقدان عزيز لديك ، مفارقه حبيب ، موت اقرب الأشخاص إليك ، فقد لوظيفتك او انهيار حلم حياتك .
الازمه التانيه :-
لما تكتشف انك طول عمرك عايش للآخرين مش لنفسك وكل ردود أفعالك وتصرفاتك نابعه من خوفك من رأي المجتمع والمحيطين بيك
الازمه الثالثه :-
لما تفقد السيطره علي متطلبات حياتك اليوميه العاديه نظرا لظروف انهيارك عاطفيا ، جسديا او ماديا .
الازمه الرابعه :-
عندما تصاب انت او احد أحبابك بمرض عضوي .
الازمه الخامسة :-
ان تصاب انت او احد من أفراد عائلتك بمرض نفسي يؤدي الي احباط ، اكتئاب ، هلاوس و يمزج الواقع بالخيال .
الازمه السادسة :-
وهي من اخطر الأزمات .. وهو الإدمان وتعريفه هنا ليس الإدمان المتعارف عليه كالمنشطات فهناك انواع اخري من الإدمان كالإدمان العاطفي ، إدمان العمل ، إدمان التكنولوجيا … الخ
مما يعيقك ويؤدي الي انهيار حياتك الخاصه .
الازمه السابعه والأخيرة :-
عندما تفقد احساسك بالحياه وكينونه وجودك وتنهار كل معتقداتك ……….
علشان كده Dr Phil وضع خطه استراتيجيه لكيفيه الخروج الآمن السريع ، بأقل خسائر وتعظيم فوائد بحيث تكون مثال يحتذي به للآخرين عن كيفيه الخروج من الأزمات بالمعلومه الصحيحة والتصرف السليم .
لكن لازم مبدئيا علشان نكون جاهزين لتقبل هذه الأزمات لازم نكون متوازنين نفسيا وده عن طريق تفادي الضغط العصبي في العموم .
وللعلم هناك علاقه طرديه عكسيه تقول كل ما زاد الضغط العصبي قلت مناعه الجسم .
وضع Dr Phil خطه سماها خطه مكافحه الضغط العصبي وتتلخص في :
١- اغفر لنفسك أخطائك الماضيه ، تأكد ان كل خطأ بحياتك هو جزء من بناء تكوين شخصيتك وخبره جديده في ذاكرتك تكفيك لحل مشكلاتك المستقبيله
٢- تحكم بردود أفعالك
بمعني صنف اهتماماتك و أولوياتك حسب احتياجاتك علشان عند ظهور مشكله ما تستطيع توصيفها بمكانها الصحيح وفك شفراتها .
٣- ( الملافظ سعد يا عب عال ) … جمله أيقونة الكوميديا ( سهير البابلي ) في ( مسرحيه ريا وسكينه) … بالظبط كده ، يعني لما تعبر عن شعورك مش لازم تسوًد الدنيا في وشك انت واللي حواليك .
يعني مثلا لو قلت ( انا مش طايق نفسي ) جسمك لاشعوريا يترجم ما تلفظت به ويزيد احساسك بالتوتر والقلق …. الخ
٤- مارس الرياضه بانتظام
عشرين دقيقه ثلاث مرات أسبوعيا او مجرد مشي لمده ٣٠ دقيقه يوميا وده في حد ذاته يقوم بإرسال اشاره الي المخ بإفراز هرمون ( الإندروفين) وهو المسئول عن الشعور بالسعاده ومقاومه الآلم ، ده طبعا غير فوائد الرياضه اللي الكل عارفها .
٥- جرب ممارسه اليوجا
وهي عباره عن سلسله من الاوضاع وتمارين التحكم في النفس ، تجمع بين أساليب ذهنيه وبدنيه وتساعد علي تحقيق الهدوء النفسي المتوازن ، حاول تستنشق هواء من الأنف لمده ٧ ثواني ثم زفير من الفم لمده ٧ ثواني أخري لمده لا تقل عن ١٥ دقيقه يوميا
٦- كل يوم الصبح حفز نفسك برسائل تشجيعيه :
زي دكتور خشبه كده ومقولته الشهيرة ( انا مش قصير أوزعه انا طوووووووووويل وآهبل ) ، أيوه حضرتك هتقلده كده وتقول لنفسك كل يوم ” إنه يوم جديد إنه يوم جميل ” ( انا جاهز لحل اي مشكله ) ( انا اقوي من اي ظروف ) ….. الخ وكرررها ما لا يقل عن ١٠٠ مره يوميا
٧- امتنع عن تناول اي كحوليات أو منبهات مشبعه بالكافيين ،
قلل الدهون والسكريات ، اشرب مياه كثير. و اكثر من الخضراوات والفاكهة
٨- نام كويس بعمق ….
يعني متنمش علي ضوء تليفزيون أو شاشه تليفون وحواليك دوشه وصوت عالي ، لا تأكل قبل النوم بفتره ، لازم تنام علي الأقل ٧ ساعات متصله ولو في ازعاج اسمع مزيكا هاديه تساعدك علي الاسترخاء او استخدم سدادات للأذن لمنع الضوضاء
٩- كافئ نفسك :
ايوه كافئ نفسك لما تحقق هدف كنت بتحلم توصله أو نجحت في اجتياز اختبار كنت بتخطط له من فتره ، اعمل أزعرينه ، اشتري لنفسك هديه او كل وجبه انت بتحبها … الخ
١٠:- خليك فريش وأوعي تكًشر أو تكتئب الدنيا فانيه ، اضحك علي الأقل مره في اليوم ، اتفرج علي فيلم كوميدي او فيلم كرتون او حتي العب مع اولادك.
١١:- استلقي في بانيو مياه دافئه او ادخل غرفه بخار
١٢:- متشغلش بالك بالناس وحياتهم ، خليك في حالك
حقق طموحاتك ونمي مواهبك حسب إمكانياتك.
هنا أحب اقولك علشان تتحكم في مزاجك العام وتبقي سعيد بطريقه سريعه كل شيكولاتة أو طماطم أو اسهلك اشتري لك صوباته موز من عند الفكهاني وأز أز فيها ،
الموز مليان بوتاسيوم ومحفز لهرمون الإندروفين.
يا خراااااااااااشي كل ده خدني الكلام و نسيت احكي لكم استراتيجيه الخروج من اخطر ٧ أزمات في حياه كل إنسان
وللحديث بقيه ……. هئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق