منوعات

ستّوته

شعر. م/ محمد رزق

والله ياامى القاعده معاكى لذيذه بشكل
ياله احكيلى على اجدادى
وسلو بلادى
انا جى وناوى المره دى
احكى ياغاليه
انا مش قايله
انا مش طايله
غير حكوينا واهل زمان
خد من بقى كلام وحديت
واجرى واعمل بيه حواديت
مش برضك عيبه
لما بنحكي ف سيره الناس
عايز تسمع منى كلام
تجرى وتكتب كده وخلاص
كنا زمان ف الناحيه ياولدى
بعد المغرب تكسي الضلمه كل مكان
و الرجاله حوالين الراكيه
والستات على لمبه جاز
و نلم العيله كبار وصغار
و يعدى علينا غفير الناحيه
والنار ف عيونه تطق شرار
والبت نفيسه كانت شاطره
ف حفظ الحواديت
تقعد تحكيلنا يجينا النوم
وكانّا اموات جوه التوابيت
بس صراحه الواد محمود
كان صوته جميل
كنت اقعد اطبل ع الحله
ويقول مواويل
ماهو سيدك برضو زمان
كان غاوى مكاتيب
يكتب اشعار لما يقولها
الشعر يشيب
دا كلام مش عيب
ماكنتش اللحمه بتدخل دار
غير كل خميس
وان جت مره ف وسط الاسبوع
نشترى ترابيس
دا العمده لو دس صنيه رز ف قلب الفرن
يبقى ابنه عريس
وسماع الراديو عيبه كبيره
ولانقدر نفتح دى السيره
طول الاسبوع كنا نحايله
حاطط الراديو جوه الحيطه
ف دولاب شايله
ويشب عبطه عايز يفتح ولاهوش طايله
وانا سامعه الراديو بيترقص
قال عتبه قزاز سلم نايله
ويقول دا الراديو هايفسدكم
صبيان وبنات
علشان تعرفو صدق كلامى
شوفو بوظ كام ف ولاد شربات
تتهز البت على الترعه
شايله الزلعه
ورجال ف قلوبها النار والعه
ودا عيب يابنات
بس صراحه كان فيه رجاله ومعدوده
مش ناس بالكيل
كان يمشى بعزه وكرامه
لو ماشى حافى او راكب خيل
راجل بصحيح ملو هدومه
مش ماشى عليل
وانت بخاطرك مانسيت ناسك
وجريت على مصر
بتصلى هناك ولا افندى وبتنسى العصر
ولدلوك لسه ماخلفتش غير حته واد
خليك ساكت والعمر بعدى عليك
هاتعجز واقف ف مكانك والوزن اهو زاد
الواد متولى ابن ابو سالم
بقى متجوز اربع نساوين
من خيبته ياولدى بتوه فيهم
ونسى العناوين
انا نفسى ياولدى تشوف واحده
دا كتير حلويين
دا بقولو ف مصر بنات حلوه
لابسه الفساتين
والنبى ياوليدى انا شيفالك هنا بنوته
طب بس اصبر واسمع شورتى
قومى ياله يانور نادى ستوته
تسرح ف الغيط ولا ميت راجل
واهى قاعده يانور تحت التوته
والنبى دى جميله وبضفاير
واهى شايله همومها ومكبوته
مش عاجبك برضو الفلاحه
دى البت اصيله ومرتاحه
لو غسلت وشها بصابونه
هاتشوفها كانها تفاحه
مش عامله ياواد زى البندر
اشى ابيض قال ودا اشى احمر
ف العيد لو لبست جلبيه
تمشى على الترعه وتتمخطر
واهى جت ستوته قوام لامى
نست المشاوير
قلتلها ياشابه عايز اشرب
جريت ع الزير
وجابتلى الميه ف كبايه
وقالتلى اشرب دى الميه هناك
كلها امراض جوه المواسير
هاتعيشى ف مصر ياستوته
دا الفرق كبير ؟
قالت دا البندر جواهم زاعبيب امشير
دا انا رحت ازور الاوليا بجلبيه حرير
وركبت هناك حاجه مجنونه
طالعه على السلم ف مكانى زى الدراسه بتمشى بسير
م الرعب ياحاجه روحى راحت
الناس ماشيه وجواها مواتير
انا بروى ف ارضى المحروته
والارض بتعشق ستوته
انا غرضى تروح لاهل البندر
وانا اعيش وهاموت تحت التوته

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق